E 16 au a alii ae fa au a tamaitai ua amata finau nei mo le fia oo i le sailiga o le siamupini o le taamilosaga lakapi taitoafitu a le Vodafone o le Teuila ma le 60 tausaga o le Tutoatasi, ua faagasolo nei i le malae o le Apia Park.
O le mae’a ona faalauiloa o au o le taamilosaga i le Aso Lulu ma faafeiloai ai foi ma le aulakapi fitu a tamaitai mai Ausetalia faapea le au a alii o le Auckland Marist Samoa mai Niu Sila, na faailoa ai ma le faasologa o taaloga i le vaega o pulu. O au e fa a tamaitai ua pulu faatasi uma lea ua iai le au mai Ausetalia o le Brra Rays, faapea au o le Nafanua, Taema ma Tilafaiga.
I le vaega o alii o le Pulu A ua taaalo ai le Ott Constructors Tamauli, SNG Sosoese Samatau, Lupesiliva mai Sapapalii, ma le Pacific Freight mai Siumu. O le Pulu B ua taaalo ai le Pacific Ezy Tepatasi, Marist St Josephs, Pacific Ezy Safotu, ma le Lulumaivini mai Ulutogia Aleipata.
O le pulu C ua finau ai au o le Ott Constructors Laulii Lion, Moataa, BSL USO mai Satalo Falealili, ma Tuanai Springboks. O le Pulu D ua taalo ai au o le BBE Vaiala, SCP Apia Maroons, o le au o le No Idea, ma le Auckland Marist Samoa. E tolu aso o le taamilosaga ua amata i le Aso Tofi ae faia sailiga siamupini i le Aso Toonai nei.
I le tatou aulakapi taitoafitu a le Manu Samoa, o lea ua sauni foi le faiaoga ma le pulega ma le tatou au ua taunuu i Aferika i Saute, mo le isi vae lea o le taamilosaga ina ua mae’a mai le vae i Los Angeles na ausia ai le tulaga fa i se tulaga maualuga na faatino ai e alo ma tama fanau lana finauga na oo i le semifinals.
