O Tawera Kerr Barlow lea sa taalo muamua i le All Blacks lea ua siilima e fia taalo mo le Wallabies e pei ona agiga i lipoti a le 9news i le aso ananafi.
O Tawera Kerr Barlow, ua 32 tausaga o lona matua, sa soifua ane i Melepone ae na me’i atu i Hamilton i le 13 o ona tausaga ma taalo ai mo le Chiefs ma taalo foi mo le All Blacks mai le 2012-2017 ma sa aofia ai i le ‘au na manumalo i le Ipu o le lalolagi i le 2015.
I le faamāmā ai o nisi o tulafono a le World Rugby ua mafai ai ona faia se suiga faavaomalo a tama taaalo i le mae’a o le 36 masina e le’i toe taalo. E iai ma isi tulaga e ao ona silasila iai e pei o agavaa o mātua.
O ni suiga afai ae talia o le a avea ai Kerr Barlow ma uluai tama taalo e faia le suiga lea i le va o ‘au e lua i le Tier 2. O isi alii taalo pei o Israel Folau, Charles Piutau sa taalo foi mo le All Blacks, Malakai Fekitoa ma Augustine Pulu na mafai uma ai ona suia e taaalo mo Tonga.
