O loo i Samoa mo malologa ma auai foi i polokalame o faafiafiaga o le onosefulu tausaga o le tutoatasi, se aumalaga o alii ma tamaitai o Leoleo o le Malo Ausetalia mai le aai o Brisbane, o loo taitaia mai e se tasi o tamafanau a Samoa le susuga Rarotonga Tevita. O le faaiuga o le vaiaso na tea nei na feiloai atu ai i latou i le tamaitai Palemia le afioga Fiame Naomi Mataafa, ma tauaao ai se meaalofa o ni ata tusi.
O ia ata sa tusia e se tagata uli o Ausetalia poo se apoliki. Faaalia e se sui o le aumalaga o se avanoa lelei lenei ua toe tatala malaga masani, ua mafai ona malaga mai ai e tafafao ma fai malologa mai i Samoa, ma asiasi ai e maimoa vaega eseese o le atunuu.
O le susuga Rarotonga Tevita sa galue muamua o se leoleo i Niu Sila, a o lei malaga ma faamautu i Ausetalia ma faaauau ai lana tautua o se Malu o le Malo i le aai o Brisbane. O loo aofia ai ma nisi sa galulue faaleoleo i lea atunuu i le aumalaga.
