I le sefulu gasegase o fatuga’o na amata ai le tautua a le falemai faamamā toto i Motootua, o le taimi nei ua 182 gasegase, o se fuainumera ua tau faaitiitia mai pe a fua i le tausaga na tea nei e pei ona faailoa e le pule o lea falemai, na oo lava le numera o tagata na faamamā toto i le 200.
O se gasegase e faigata e pei ona faaalia e le afioga Mulipola Roger Hazelman, le pule o le falemai faamamā toto ona e iu ai lava le soifua, ae o le itu sili ona faigata i le vaavaai i le numera o tagata ua aafia o le matutua o tausaga o le 60 ma lalo ifo ua faaletonu fatuga’o e mafua ona o faama’i lē pipisi e pei o le suka ma le toto maualuga ua tuai ona togafiti.
Ua iai nisi o le fanau e pei o le matua e 14 tausaga ua aafia fatuga’o, ae ua oo lava foi i le tagata ua 18 ma le 30 tausaga le matutua ua faamamā le toto ona ua faaletonu fatuga’o.
Le Pule o le falemai faamamā toto i Motootua, afioga Mulipola Roger Hazelman.
