Ua faatoese le pamu penisini a le BP i avetaavale na sese ona utu a latou taavale, lea ua le penisini 91 ae ua tiso.
E silia ma le 14 itula lea na utu sese ai tiso i taavale na afea le pamu penisini lenei a le BP i Russley Road i Kalaiesetete.
Na lipoti a le Stuff o loo femolimaua’i ai le toatele na aafia i le faateia i le pe faafuasei o le taavale a o iai i luga o le auala ma aafia ai galuega ma fuafuaga a aiga.
E le o faigofie i nisi o aiga ua leai ai se taavale ona o lea ua tutu i fale inisinia ma e iai nisi e lei fiafia i le auala na fiu ai e taumafai e faafesootai le pulega o le pamu penisini e le gata o le umi ona faatali i luga o le telefoni ae o le fiu e tatali le toe fesootai ane.
O nisi faatoa iloa o le tiso ua pe ai le taavale ina ua auina atu i le fale inisia.
Ua faatoese le pulega o le pamu penisini ma o lea foi o le a toe totogi e le kamupani taavale ua faamaonia ua faaleagaina ona o le sasi o le auaunaga.
E ese mai i Kalaiesetete, o le amataga o Aokuso na tupu ai foi le mea lava lea e tasi i le taavale a se tasi o aiga na utu i le pamu penisini a le Caltex i Aukilani.
