E lē o mapu le matagaluega o le soifua mālōlōina i Samoa i le ave pea o fautuaga i le atunuu lautele i puipuiga o le faama’i Koviti-19, ae ua alu faatasi ma fautuaga o le faia o tuipuipui o le gasegase o le fiva taifoi, faapea ma le gasegase kanesa e tupu i le faa’autagata o tamaitai lea e ta’ua i le gagana Peretania o le Human Papilloma Virus poo le HPV.
Ua faailoa e le Matagaluega le faasolo atu o le latou galuega o le faaooina o le tuipuipui mo ia gasegase aemaise le kanesa o le faa’autagata o tamaitai i a’oga i nuu ma afioaga. O se galuega lenei o loo agai i fanau teine i le vasega tausaga 8 ma le tausaga 13, ae o loo aofia ai ma tamaitai mai le 13 i le 17 tausaga le matutua ua lē o toe a’ooga.
O lea ituaiga o kanesa e lona 4 i le faasologa o kanesa e masani ona aafia ma maliliu ai tina ma tamaitai i le lalolagi, ma ua faailoa e le soifua mālōlōina e pipisi i ni feusua’iga tulou, ma se tasi o aafia ai. O le tāua o le tuipuipui ona e to’atele tagata e lē silafia ua leva ona aafia i lea vairusi ona e tuai ona alia’e āuga. O le tuiga o loo faagasolo nei o loo faamoemoe le soifua mālōlōina ia faasopolia uma ai le atunuu.
