Ua faamautu nei se fesoasoani tupe e selau afe tala Amerika mai se lālā o Malo Aufaatasi le UNDP ua mautinoa o le a faaaogā tatau e le faalapotopotoga o loo atina’eina le meli suamalie poo le honey, o se taumafa e alumia ma mana’omia e tagata.
O le foa’i lenei sa faamautu lona tuuina atu i le Samoa Apiculture Organization i le vaiaso nei, ma le faamoemoe o le faauluuluga o le UNDP i Samoa le susuga Jorn Sorensen, o le a fesoasoani e faaleleia lea atina’e tau faato’aga. E to’a 45 sui o lea faalapotopotoga ma le 40 pasene o tina ma tamaitai ma o le isi lea o itu tāua o le maua e tamaitai o galulue i le atina’eina o le meli suamalie o le silafia ma le iloa e siitia ai a latou taumafaiga.
O se fesoasoani tupe lenei o loo tauala mai i le fesoasoani a le UNDP mo le siosiomaga o le lalolagi e fesoota’i i faafitauli o suiga tetele o le tau, auā tasi lea mafuaaga o le aafia o ia faato’aga i faafitauli. O le siamu mai le meli suamalie le honey, o se tasi o taumafa o loo mafai ona togafiti ai nisi o gasegase ma maua ai foi le soifua mālōlōina lelei e ui e suamalie malase tele e faaeteete gata mo i latou ua aafia i le gasegase o le suka.
