Faailoa le lagolago a le tamaitai palemia i taumafaiga a le sui momo’e ia Efeso Collins.
O le aso ananafi na asia ai e Jacinda Ardern campaign a Collins faia i Henderson poo nisi nei o ana taumafaiga a o finau ai i le tofi pulenuu o Aukilani, ma e le gata o se asiasiga a o lea foi na fesoasoani le palemia i lea faamoemoe.
O le feiloai atu ai o Jacinda i sui o loo galulue e aunoa ma se totogi i campaign a Collins, na ia fesoasoani ai e faia ipu ti ma meaai māmā mo le au galulue.
Saunoa Collins, na ia faailoa i tala a le TV1 lona talia ma le agaga faafetai o le lagolago a le Palemia aemaise o lona auai atu ananafi e lagolago lana campaign e ui i le pisi i ona tiute tauave.
O Collins, o lea na muai faailoa e le Labour o loo ave iai lana lagolago.
A o talanoa ai la i pepa palota o le faigapalota faaitumalo lava ia na o Aukilani, o lea ua tuai pe a toe lafo i le pusameli ma i luga o le upega tafailagi a le Auckland Council o loo fautuaina le agai i supamaketi a le Countdown, faletusi faapea nofoaga ua mae’a tapena e faaoo iai lau pepa palota.
O le itula e 12 i le aoauli o le Aso Toonai nei e tapunia uma ai pusa palota.
