Ua faailoa mai nei e le Radio New Zealand le filifilia ai o se alo o Samoa le susuga Siliga Sani Muliaumasealii e avea ma tagata faasalalau fou mo le polokalame Mālū o le Taeao poo le Breakfast show i vaiaso ta’itasi.
O le a galulue faatasi ai lea alo o Samoa ma se tasi o sui faasalalau ua leva ona galue i lea vaega ia Carey McDonald.
O Siliga o se alii Samoa na ola a’e i Tāmaki Makaurau ma na a’oga i Kuiniselani i mataupu tau musika ma faasolo atu ai ina faafiafia i nofoaga ma polokalame tetele e pei o le Covent Garden, o le Sydney Opera House ma le Theatre an de Wien i Vienna.
Sa ia auai foi i nisi o polokalame i musical theatre, radio plays mo le BBC4 faapea televise. O se alii talenia tele, i vaega o tusitusiga, o le vaega o le production, faia o ata tifaga. I le tausaga e 2012 sa amatalia ai (co-funded) e Siliga se tasi o polokalame faaigoa o le GAFA Arts Collective o se galuega muamua e iai tu ma aga faasamoa i totonu o le atu Europa.
O le tele o galuega na faatino e lenei alii ma o le filifilia ai o ia e auai i le RNZ Concert ina ua toe foi mai i Niu Sila mai le silia ma le 30 tausaga talu ona i atunuu mamao.
Faailoa e le Faatonu o le RNZ Concert ia Liisa McMillan o le tofia ai o le susuga Siliga ma Carey McDonald o le a saga mauaa ai le auaunaga i luga o le ea a le kamupani ma maua ai le tele o tala lata mai i mea o loo tutupu poo news.
O le tamaitai ia Carey McDonald mai Aukilani ma e iai foi lona sootaga i musika lea ua tele tausaga o galue ai. Talu mai le tausaga e 2017 sa avea ai o ia ma Faatonu Sili o le Auckland Choral ma na uluai auai atu e avea ma sui o le RNZ Concert i le tausaga e 2003.
