Faate’ia tala ua sau o loo vaai le malo e faaitiitia faia’oga i totonu o le atunuu se’i tau ufiufi ai le ava o le paketi.
E to’a 3,119 faia’oga ua mana’o le malo ia faagata a latou konekarate se’i tau faapaleni ai le $12 miliona e lē o atoa ai le paketi o le tausaga faaletupe 2022/2023.
O le faafitauli ua tulai e tusa ma lipoti a le TV1, o lea na toe fetuuna’i e le malo poloketi e le’i uma ona faaaogā tupe na tuuina atu iai i le 2019, peitai mai lea taimi ua maitauina ua alu i luga tupe e moomia ona ua alu i luga tau ma o lea ua lē lava ai nei ma le paketi lea e faauma i le faai’uga o Iuni o le tausaga fou.
I faamaumauga e faapea ua vaavaai ai le matagaluega o a’oga i le mafai e faaitiitia ai avanoa o faia’oga ma e ono lē toe faafou ai konekarate faapiriota lē umi lea na sainia.
Peitai ona o nei avanoa faigaluega o loo puipuia i lalo o maliega ma le iuni, o lea ua sau ai tala o le a feutaga’i le matagaluega ma iuni.
Ae i luga o tala a le leitio a Niu Sila, o loo faaalia ai e nisi o pule a’oga latou te lē o silafia lea suiga.
Ae mai le Post Primary Teachers Association, e lē o fiafia i le faia o lea tonu e aunoa ma ni faatalanoaga ma o loo matua’i moomia faia’oga nei o loo o atu i lalo o le Kahui Ako scheme lea e fesoasoani i fanau o le tusa ma le 1,800 a’oga ma e silia ma le $100 miliona e faatupe ai i le tausaga.
