E to’a 12,000 isi tagata faigaluega mai fafo ua faailoa e le malo o le a aumai se’i fesoasoani i le utiuti o tagata galulue iinei.
O le suiga lea na fofoga mai e le minisita o femalaga’iga Michael Wood ma o loo aofia ai i latou e omai i lalo o visa ua ta’ua o working holiday scheme faapea le toe faaopoopo o aso e aogā ai visa o tagata faigaluega o loo i totonu o le atunuu.
Ae mo tagata faigaluega o le a uma aogā o visa i le va o le aso 26 o Aokuso ma le aso 31 o Me, 2023 o le a mafai ona toe faaopoopo le isi 6 masina e aogā ai.
O suiga na saunoa iai le minisita, ua faalogo le malo i finagalo faaalia ma popolega o pisinisi ma o pisinisi o le a manuia i lenei maliega fou e aofia ai fale fasimanu, nofoaga o nonofo ai tagata matutua, faufale ma le vaega o turisi.
Ae i itu tau totogi ua saunoa le minisita o se maliega o le a iai se faatanaga faapitoa tau i le maualalo faatulagaina, ma o le a mata’itū lava foi e le malo.
