O le aso ananafi lea na amatalia ai taaloga a i latou o loo iai aafiaga tumau o le mafaufau ma le tino lea o loo faatautaia nei i Berlin Siamani ma na auai ai le Konesula o Samoa i Siamani Helmut Morent e tapuaia faagatama a alo ma fanau tamaitai i le taamilosaga o le taaloga volipolo.
Na faailoa e faamatalaga a le Olimipeka Faapitoa a Samoa e faafetaia ai le auai o lenei tamalii e tapuai ma lagolagosua i taumafaiga a le ‘au.
O le taaloga volipolo a tamaitai lea na manumalo ai le ‘au a Samoa i le la taaloga ma le ‘au a Italia ma o le afiafi nei lea o le a taaalo ai ma ‘au e lua mai Botswana ma Serbia.
O loo ua amatalia foi taumafaiga a alo ma fanau a le ‘au o loo tauva ai i isi faagatama e pei o le afeleti ma le faatavalepolo.
O lenei taamilosaga o le a faamae’a lea i le aso 25 o le masina o Iuni.
