O le tāua o le silafia ma malamalama o sui faipule o le Palemene i  o latou tiute faatino ma le auai o ni sui o faiga faavaega faaupufai poo political parties, o le sini lea ma le autu o se a’oa’oga o loo auai ai sui o pati faaupufai e lua le Faatuatua i le Atua Samoa ua Tasi, ma le Vaega e Puipuia Aiātatau a Tagata.

O le amataga o le vaiaso na amata ai lea a’oa’oga i le faletalimalo o le Taumeasina Resort ma e fai eseese a’oa’oga. O le taeao le pati faaupufai o le Faatuatua i le Atua Samoa ua Tasi, ae o le aoauli le Vaega e Puipuia Aiātatau a Tagata. O sui mai le faalapotopotoga e ta’ua o le International Republican Insititue o loo faatautaia lea a’oa’oga ae faatupe e le Malo tele o Amerika.

Faaalia e se sui o loo lotolotoi i le sailia o lea fesoasoani, o le tāua o le mafutaga e silafia ai e sui faipule e lē na o taimi e faia ai palota e saili ai tofi faipule o le Palemene e auai i ni pati faaupufai, ae o taimi uma. O se a’oa’oga foi e pei ona faailoa e lea sui e sasaa atu ai faamatalaga e faatatau i auala ma metotia e tapena ai le lotoifale o se vaega faaupufai ina ia lava tāoso i le faia o faatosina e mulimulita’ia ai faiga tau pulega Malo faatemokarasi.

O se lu’itau tele lea i le a’oa’oga e pei ona faaalia e se sui faipule o loo auai, ona e iai vaega o le tatou aganuu e faamata’uina ai le faatemokalasi.