O le galulue faatasi o Samoa Tutoatasi ma le faigamalo a Amerika Samoa i gaioiga e fesootai i le atiina ae o tamaoaiga o Samoa e lua, o lea ua amata faatino nisi o mataupu sa soalaupule i feiloaiga ma talanoaga o le Atoa o Samoa, i le asiasi mai i lo tatou atunuu o ni sui o le matagaluega o faatoaga mai Tutuila ma Manu’a e silasila i le tulaga lelei o loo iai atinae o le fuamoa mo mea taumafa, e pei ona faagaioia e nisi o pisinisi tetele i Samoa falemoa mo lea tulaga.
Ua le gata foi i le fuamoa ae o loo asia e sui o lea matagaluega i le teritori le tulaga o iai le tapenaina lelei o aano o manufasi o le povi faapea meaituaolo.
Ua faaalia e le Minisita o Faatoaga ma Faigafaiva le susuga Laauli Leuatea Polataivao Fosi Schmidt, o le asiasiga a sui o le matagaluega o faatoaga mai Amerika Samoa o le tuliloaina lea o le mataupu sa tuuina atu e le Malo o Samoa i talanoaga o le Atoa o Samoa, faasino i le avanoa e toe mafai ai ona ave aano o manufasi mai lo tatou atunuu e faatau i le teritori.
Le afioga i le Minisita o Faatoaga ma Faigafaiva susuga Laauli Leuatea Polataivao Fosi Schmidt.
