Ua amata ona faagasolo polokalame o faafiafiaga e sami ai le aulia o le 60 tausaga o le tatou Tutoatasi, e pei ona sa tatala i pesepesega faaleagaga na faia i le maota o Tupulaga o le Ekalesia Faapotopotoga Kerisiano Samoa i Mulinuu i le po o le Aso Sa muamua o lenei masina fou o Setema, lea sa faatumulia i taitai o le Malo ma le mamalu o le atunuu na auai.

O le Aso Gafua lenei ua faagasolo ai faleaiga ma faaaliga o meataulima faapea taaloga mo le fanau, i le nuu o sauniga faaleaganuu a le pulega o tagata tafafao i le eleele fou le cultural village, ae o le afiafi o siva faamalositino e saunia e le matagaluega o le soifua maloloina, sosoo ai ma le tauvaga o siva faa-Samoa i mauluulu, o sasa ma faataupati.

O le vaega mo faafiafiaga ma isi sauniga ua mae’a fausia i le malae o le Matagialalua Friendship Park i tuāmaota o le Malo i le eleele fou e faia ai lea tauvaga i le po muamua o polokalame o faafiafiaga o le 60 tausaga o le tutoatasi.