Ua amata nei ona faaaoga le masini faapitoa mo togafitiga o le kanesa i se tasi o auaunaga i Aukilani.
Na lipotia i le aso ananafi i le One News e 7 miliona le masini lea o le Cyberknife e mo le togafitia o le tusa ma le 400 o gasegase i le tausaga, i latou e iai aafiaga tau le faiai, tulou faapea maeaalio ma gasegase o le kanesa.
Fai mai pe a ma le lua tausaga sa faia ai aoaoga a le aufaigaluega auā le faaaogaina o le masini ma le saunia o le nofoaga e faia ai togafitiga i le Auckland Radiation Oncology atoa ai ma le aumaia o le masini faapitoa lea mai le malo tele o Amerika.
Saunoa ai le alii fomai o Dr Benji Benjamin ua lagona le fiafia o le a maua sea fesoasoani mo gasegase. O se tasi lenei o vaega o le inivesi e 40 miliona i le va o le Southern Cross Healthcare ma le Mercy Ascot.
Mo le taimi nei e na o gasegase e iai inisiua tau le soifua maloloina ma i latou e mafai ona totogiina le tau o togafitiga e mafai ona faaaogaina le masini peitai fai mai le alii fomai o loo iai le avanoa e faatalanoa e le Auckland Radiation Oncology ma le Health NZ se avanoa mo gasegase lautele.
