I le to’afitu o tamaitai na muamua lesitala suafa mo le tauvaga e sailia ai se Tausala o Samoa i le Teuila ia Setema, o lea ua faailoa e le pulega o le Manaia Event o loo tapenaina le tauvaga e to’aiva isi tamaitai ua faaopoopo atu ma ua maua ai nei le to’a 16 ua lesitala mo le sailia o se tausala o le atunuu.
O lea foi ua lipotia le sauni o nisi tauvaga i Ausetalia i ona setete o alala ai le to’atele o tagata Samoa e faia a latou tauvaga e saili ai ni o latou tausala e auai i le tauvaga autu.
E lē o taofia ai le avanoa pea o isi tamaitai Samoa i atunuu i fafo e auai pe a lesitala sa’o mai i Samoa e tusa o aiaiga o le tauvaga lenei ua tolu tausaga e le’i toe faataunuuina ona o vavao o puipuiga o le faama’i ua lē mafai ai ona fai malaga mai ona o le tapunia o tuaoi faavaomalo. O loo tatala pea le avanoa mo nisi tamaitai e fia auai i lea faamoemoe e taualuga iai polokalame o le vaiaso o le Teuila.
