Ua fefaasoaa’i i luga o auala o fesootaiga televavave, le facebook, faamaisega ma faamafanafanaga a le atunuu, ina ua sau i tua le tala faanoanoa, ua tuua le malo e se tasi o Toa manumanu a Samoa i le itu tau taaloga i totonu o le atunuu, le Susuga Seiuli Paul Wallwork.

O vaitausaga o le 1980 na amata iloga ai le suafa Paul Wallwork, vaeane le suafa Seiuli, e lē gata i le faagatama o le lakapi e pei ona sa siitia maualuga ai le aulakapi 15 a tama o le Kolisi o Avele a o avea Seiuli ma puleaoga, na iloga ai foi le igoa o le aulakapi a le I’avai mai Tanugamanono a o avea Seiuli ma faiaoga o le ‘au, aemaise foi o lona tulai mai e faafoeina le taaloga o le siisii u’amea mamafa i lona vaitaimi, seia oo ina ua faaauau mai e lona alo le Afioga Tuaopepe Asiata Jerry Wallwork, lea ua atili lauiloa ai Samoa i le lalolagi atoa.

O se tala faanoanoa mo le aiga, o uo mamae aemaise i latou uma na fofoa mai le soifua taalo i nei taaloga mai le Susuga Seiuli, faapea Samoa atoa ua latou lausilafia lenei auauna aogā mo Samoa, e lē gata o ia ae o i latou na tupuga mai ia te ia o loo faaauauina le tautua ia Samoa i tomai eseese.

O le Susuga Seiuli, o le tuaa lea o le tamaitai Loia Sili a Samoa o loo seei i le tofi i le taimi nei, Susuga Su’a Hellene Wallwork-Lamb.

E momoli atu faamaisega ma faamafanafanaga i le afioga i le faletua, Susuga Su’a Iulia Wallwork, le nofoaalo ma le aiga faavauvau.