O le afioaga o Falealupo i Savaii o loo faaauau pea le una’i ina ia puipui le manulele a le atunuu le manumea.
I lipoti a le Samoa Observer na faailoa ai e se sui o le afioaga Taofinuu Lamositele ua seasea toe vaaia lea manulele i Samoa peitai e faafetaia le galuega a Falealupo i le puipuia lea o le vaomatua o loo mafai ona latou vaaia tino le manulele i le tele o taimi.
Na ia ta’ua o lea manulele ua tele igoa e iloga ai e pei o le “manumā” aua o le manulele e mā pe a vaaia ni tagata.
O se tasi lenei o unai a le Malo e tauala atu i le Matagaluega o Puna’oa Faalenatura ma le Siosiomaga ina ia faasao ma puipui le manumea, o se manulele e tāua tele ia Samoa.
O le faamoemoe a le afioaga ina ia mafai ona galulue faatasi uma nuu o Samoa e puipui lea manulele a le atunuu ma ia faasao puna’oa faalenatura ma faamamā le siosiomaga.
