O lea ua faato’ā toe maua mai se tala lata mai i le auaunaga a le soifua mālōlōina i le pipisi ai pea o le faama’i Koviti-19 i le silia ai nei i le 3 vaiaso talu ona toe tatala tuaoi faavaomalo o le atunuu i malaga masani.
O le lipoti mulimuli lava sa faamauina ai le 31 o tagata na aafia i āuga o le faama’i, ae o le lipoti lata mai lenei i le tuanai o le fitu aso ua faamauina ai le aofa’iga e 64 o gasegase fou. O le fuainumera lea na amata faamauina i le aso 14 o Aokuso e oo mai i le ta o le 2 o le aoauli o le Aso Sa na te’a nei le aso 21 o Aokuso.
O faamaumauga fou nei ua oo atu ai le aofa’iga atoa o tagata i Samoa e aofia ai ma pasese malaga mai fafo ua maua i le siama i le 15,767, ae o le to’a 15,598 o gasegase mai le lautele o le atunuu ae 169 o pasese malaga mai fafo ma o fuainumera ia talu mai le masina o Mati o le tausaga 2020.
E valu gasegase o loo taofia i nofoaga faapitoa i le maota gasegase i Motootua, ae leai ni gasegase o le koviti o taofia i potu mo gasegase tigaina. Ua faailoa mai foi e le matagaluega o le soifua mālōlōina o loo tumau pea i le 29 le aofa’iga o tagata i lo tatou atunuu ua fano soifua i le faama’i. O le malaga a le Air New Zealand o le aso 16 o le masina nei e to’atolu pasese na maua ia latou su’ega ua aafia i le faama’i.
Ae i le kalafi o faamaumauga mai le taimi na pipisi ai i tua le faama’i ia Mati o le tausaga nei, o loo matauina ai o le masina o Aperila na matuā maualuga ai le aofa’iga o tagata na aafia, ae o le taimi nei talu mai le aso 18 o le masina nei o Aokuso, ua maualalo lava le numera o gasegase ua lē o toe oo i se to’aselau.
O loo tumau foi ona faamauina le maualuga o pasene o le itupa o tamaitai ua aafia i le Koviti-19 e 57 pasene faatusa i le itupa o alii e na o le 43 pasene.
