O le a toe silasila le Fofoga Fetalai ma le Palemene i le faaiuga a le faamasinoga sili ua faamuta ai le faasalaga na faamalolo le tumau ai seia iai se aso, le taitai ma se tasi o sui faipule sinia o le Itu agai.

Ua faailoa e le fofoga o le fono le susuga Papalii Li’o Oloipola Ta’eu Masipa’u, ina ua maua iai se fesootaiga i le telefoni i le afiafi o le Aso Tofi, na ia saunoa, ua ia talia le faaiuga, ae o le itu taua o le a avanoa ai le faia o ni teuteuga i le tulafono o tulaga mamalu, aloaia ma taualoa a le Palemene ina ia mafai ona faasagatonu ai ni lape o lea tulafono e pei ona faailoa i le faaiuga a le faamasinoga.

O lape ia e faasino i le faasologa o galuega i le tagofia o se suesuega poo le process, ina ia avanoa sui faipule e tali atu i se faasalaga o le a faia iai, ina ia le noatia a latou aiātatau e faaali ai lagona i se faasalaga o le a finagalo iai le Palemene.

Faaalia e Papalii e tatau ona maua se faaiuga i le tulaga ua aumai e le faamasinoga, i le tatau ona iai ni finagalo o faipule i le togisala e pei ona sa fautuaina e le komiti o tulaga mamalu ma aloaia, a o lei toe usu le Fono Aoao Faitulafono i le ogatotonu o le masina fou o Oketopa.