E teena e lē ua molia ona moliaga na ia fanaina le tina i Aukilani i Sisifo. 

E lē o mafai ona faailoa le suafa o le tama 34 tausaga na molia i le aso lava na sosoo ai ma le maliu o lē sa faigaluega i le matagaluega a le social development, Aitasi Carmella Hohenberger.  

O le tina ua maliu e faapea na fana ma maliu ai lava i lona fale i Newington i Henderson i le aso 13 o le masina talu ai, ma e faapea o le faalogoina ai e tuaoi o pulufana na pāpā, mulimuli ai alu ese saoasaoa le taavale mai lea nofoaga na lipotia ai loa i leoleo. 

O ananafi le taimi muamua ua valaau ai lē ua molia i le faamasinoga maualuga i Aukilani, ma o lea na faaulu ai e lana loia lona teena o moliaga. 

Ua faamaise ai ma le pule sili o le matagaluega a le Social Development i le aiga faanoanoa faapea le aufaigaluega.