Na ou manao lava ia avea a’u ma Miss Samoa i le lumanai.  

Ua 25 tausaga o le tamaitai ia Cherish Faamanū Manaia ma o loo aumau nei i Kalaiesetete ma ona mātua ma faigaluega o se tamaitai e tautua i luga o vaalele a le kamupani o le Air New Zealand. 

O Cherish e tupuga mai afioaga o Satufia Satupaitea ma Asau i Savaii, mai Malifa ma Nuusuatia i Upolu, ma na soifua ma ola ane i Samoa i le amatamataga o lona olaga a o lei malaga mai i Niu Sila ma lona aiga. 

I lona tuputupu a’e i totonu o lona aiga i Samoa na masani ai ona matamata i le TV i tauvaga o le Miss Samoa o le Teuila ma lona naunautaiga e fia avea o ia ma Miss Samoa i le lumanai. 

E tele ni moemitiga sa iai i lona olaga talavou i lona laitiiti ae pei o le moemitiga sili lea na nofo pea ma ia poo afea se taimi e tali ai le Atua.  

 Ua maua le avanoa e malaga mai ai ona mātua ma lona aiga i Niu Sila ae lei mafai ai lava ona aveesea le manaoga sa taoto pea i lona loto o le fia avea ma Miss Samoa, ma na faaauau ai pea lana masani o le matamata i le TV i tauvaga o le Miss Samoa Niu Sila faapea ai ma tauvaga o loo faatinoina i le Teuila i Samoa i tausaga taitasi. 

Peitai o le tausaga lenei na lagona ai e le tamaitai o Cherish atonu o lona taimi lenei ua tatau ai loa ona faaulu lona igoa i le sailiga o se tausala lalelei o Samoa i Niu Sila nei. 

Ua lagona lava i ona tino o ana tapenaga ma sauniuniga ua lava saunia i soo se mea e agai iai le tauvaga. 

A o sauni le sailiga o se tausala a Niu Sila i lenei tausaga, na ia ta’ua sa masani ona fai ana faataitaiga i totonu o lona fale pe a leai nisi o lona aiga, o totonu o lana taavale pe a alu I se mea, o nei mea uma ua fai ma sauniuni ai, ia tali le manaoga ua leva ona nofo ma ia. 

O le masina ua mavae na mae’a ai loa le sailiga o le tausala lalelei poo le Miss Samoa Niu Sila mai tamaitai lalelei e toalima lea sa faia iai le faaiuga o le tauvaga, ma faapaleina ai loa le tamaitai ia Cherish Faamanū Manaia mai Kalaiesetete. 

O se talafaasolopito i le soifua o lea tamaitai talavou i lona olaga ina ua mafai ona tali le moemitiga ua leva ona nofo ma ia. 

Ma ua faafiafiaina ai ona mātua ma lona aiga aemaise lava i lona tina ina ua tau lau o lona faamoemoe. 

Na saunoa foi le Miss Samoa Niu Sila ia Cherish Faamanū Manaia ua lava tapena e tauave ona tiute faaletausala tamaitai ua valaauina ai o ia e lona atunuu, aemaise ai o ana tapenaga mo Samoa i le sailiga o se Miss Samoa i le Teuila ia Setema.