E 21 moli susulu e ola i le malosi o le la, ua pupula i totonu o le malae taalo o tupulaga talavou o le Ekaesia Faapotopotoga Kerisiano i Si’utu i Savaii, ma ua mafai ai e le autalavou ona maua nisi seleni mo a latou atina’e, pe a faaaoga lo latou malae taalo mo taaloga ma isi fuafuaga.
O le faafiafiaina o le faafeagaiga ma le au talavou faapea le afioaga i le maua atu o ia moli na latou faafeiloai ai sui o le Toomaga mo ē Puapuagatia na tauala atu ai le foai o moli, i se ‘ava faatali.
O le tasi lea o polokalame fesoasoani o loo faatino i le polokalame o le tetee atu i sauaga o loo faatino i se foai mai le Malo ae faatino e le Toomaga mo ē Puapuagatia. O le atiina’e i le faaleleia o le autalavou EFKS a Si’utu ua latou tatala ai le malae e faaaogā e isi autalavou i se tupe e totogi, ona o lea ua iai moli e ola i le malosi o le la poo solar lights.
