Ua faia nei se su’esu’ega faalotoifale a le Matagaluega o Leoleo, Falepuipui ma le Ola Toe Fuata’ina, i le mafuaaga na lē oo atu ai molimau autu e to’alua a leoleo i le faamasinoga o Maugaloto Palu sa tuua’ia i le solitulafono o le taumafai e faaoo le maliu, moliaga o le umia o se aupega mata’utia ma moliaga e lua o le faaoomanu’a tuga.
O se vaiaso e le’i mamao atu na faatulaga e su’esu’e ai molimau o le mataupu ina ua tolo faatolu ona o le mafuaaga lava lea, ma na faia ai le faai’uga a le faamasinoga e faalēaogā moliaga ina ua talosaga loia a leoleo e toe faaui i tua a latou moliaga ona ua lē auai atu molimau. O molimau e le’i oo atu o ni taulelea se to’alua na aafia i le gaioiga solitulafono a lē na molia.
Le Komesina o leoleo le susuga Auapaau Logoitino Filipo. O le feiloa’iga muamua a le Komesina filifilia fou ma le Matagaluega na saunoa ai ma le Minisita o Leoleo ma Falepuipui ma faailoa nisi o lu’itau e ao i le komesina ma le pulega ona silasila toto’a iai, o le ave o ni moliaga i le faamasinoga, ae faalēaogā ona o le lē lava o mau a leoleo.
