Fai mai leoleo o loo latou silafiaina le tagata o loo talosaga mo ni fesoasoani i luga o le social media, o ni foai mo le autau a Lusia ma o loo latou suesueina i le taimi nei pe ua solia e lea tagata le tulafono.
Lipotia e le leitio faavaomalo a Niu Sila o le tamaitai mai Aukilani o Antonina Ovchinnikova sa ia talosaga mo ni foai e lagolago ai le ami a Lusia lea o loo osofaia nei Ukraine.
Ua ia faamaonia ane i le Stuff ua ia mauaina le silia ma le 1.5 miliona rubies tusa lea ma le 43 afe tala Niu Sila.
O le tupe o le a faaaoga i sapalai o aitema e pei o flak jackets, ma nisi mea e pei o drones mo fitafita Lusia.
E le o fia faia se faamatalaga a le matagaluega o le va i fafo i le tulaga lea ae i lalo o le tulafono o le Russia Sanctions Act e solitulafono mo soo se tagata Niu Sila ona saunia ni auaunaga poo ni tupe i totino o loo faia agai iai sā a le atunuu.
E lata i le 20 faletupe i Lusia o loo iai i le lisi a le matagaluega o le va i fafo o loo faia iai sā ia poo sanctions faasaga ia Lusia.
O lona uiga la o loo faatalia le iuga o le suesuega o loo faia i lea tamaitai pe ua ia solia tulafono e ala i ana sailiga fesoasoani o loo faia i luga o le social media.
