O le 3 miliona o loo fia maua i le faamoemoe o le Ekalesia Katoliko i Samoa e toe fausia ai fale ma faafou ai le Malumalu o le Kolisi Faafaifeau i Moamoa.
O le sailigatupe muamua i le Aso Toonai na te’a nei na mafai ona aoina ai se tinoitupe e silia ma le ‘afa miliona tālā, poo le $506,550. 80 sene. O le faamoemoe lenei sa tapenaina e le komiti e ta’ita’ifono ai le afioga Tuiaopo Andrew Ah Liki na amata i le fitu i le taeao ma sa faaaogā ai auala o fesoota’iga a le ekalesia i lana faletelevise ma le leitio.
Sa fesoasoani foi iai le fale televise o le TV5 ma sa avea ma sootaga i le to’atele o le atunuu i Samoa ma atunuu i fafo i le faalauiloaina o foa’i tupe. O loo tatala pea faitoto’a mo lenei faamoemoe mo i latou e fia fesoasoani aemaise lava i tamafanau a le Ekalesia Katoliko sa a’otauina i le Kolisi Faafaifeau i Moamoa.
