E to’a 50 fanau mai le matutua o le 6 i le 15 ua mafai ona a’o’oga i le polokalame fesoasoani a le faalapotopotoga o le Toomaga mo ē Puapuagatia o loo faatupe i se fesoasoani mai le Malo.
O ia fanau e pei ona faailoa e le faalapotopotoga sa faatau savali oloa i vaega eseese o le taulaga, peitai o le fesoasoani ua faatino ua mafai ai ona totogi pili o ia fanau, ma faatupe foi meaa’oga e pei o api o peni ma isi vaega e mana’omia ia latou a’oa’oga.
O le polokalame o le tafi ese o le sauaina o tamaitai ma alo teine o le atunuu o loo faatino e le Toomaga ona o se tasi lea o faiga faavae a le faigamalo ma ua mafai ai loa ona fesoasoani i le toe ave o nisi o fanau ua lē gafatia e mātua ona faatupe a latou a’oga e lē gata i togiga, ae faapea pili ma meaa’oga.
Faaalia e le Toomaga o le latou polokalame o loo feagai ma tupulaga talavou o le faalapotopotoga na mafai ai ona faamautū nisi o mafuaaga o le lē a’o’oga o nisi o fanau, e pei o le lē faigaluega o mātua ae to’atele le fanau, faafitauli o le lē toe maua o se mafutaga a mātua ma fanau ona ua tete’a le ulugalii, ma faafitauli o le to’atele o tagata i totonu o se aiga ae faaletonu fale o loo nonofo ai ma ua lamatia ai foi le saogalemu tau i le soifua mālōlōina.
O le fo’ia o le mativa ma le lē tagolima o se tasi o manulauti o loo autū iai nisi o polokalame a le faalapotopotoga ua ofo ai le fesoasoani mo aiga lima vaivai ma maualalo le tamaoaiga.
