by Maina Vai

Ua fesiligia e le faletua o le Afioga ia Patu Tiavaasu’e Falefatu Sapolu o le sa avea ma Faamasino Sili le amiotonu o le uili poo le mavaega tusitusia o loo masalomia na saini ma faia e lona toalua a’o le i maliu. O lea mataupu o loo faia nei iai iloiloga a le Faamasinoga Mauluga i Mulinu’u i luma o lana Afioga i le Faamasino Sili ia Satiu Simativa Perese.

O le tagi a le faletua ia Iliganoa Sapolu o loo taua ai e faapea ua saini sese pe faasolitulafono e le tuafafine o Patu ia Katalaina Sapolu, faapea ai le atalii o le uso o Patu ia Maka Sapolu le uili ma ta’ua ai o Patu Falefatu na ia faia.

O loo tula’i le tamaitai loia ia Magele Leone Su’a mo lē ua tagi, o Shane Wulf o loo tulai mo le ofisa o Tausi Mavaega le Public Trust ae o loo tulai le tamaitai loia ia Unasa Iuni Sapolu mo Maka ma Katalaina Sapolu.

O le taeao analeila na faafofoga ai le faamasinoga i le faamatalaga a le faletua o Iliganoa 74 tausaga o se tina faipisinisi, lea na ia ta’ua ai, e leai lava se taimi talu ona la nonofo ma Patu Falefatu na faapea atu ai o loo iai sana uili. Na pau lava le tala a lona toalua ia te ia e leai sana uili ae ua ia tuuina atu mea uma ma lona faatutuaga ia te ia pe a uma lona soifua.

Na faailoa e le faletua i le Faamasinoga o Patu Falefatu na maliu i le aso 28 o Novema 2021, ae na falelauasi i le aso 11 o Tesema 2021. O le aso 13 o Tesema o le tausaga lava lea a o talanoa ma lo latou aiga, na faailoa atu ai e Katalaina, o le tuafafine o Patu e faapea o loo iai le uili a Patu i le Public Trust, pe o ia silafia. Sa ia ta’ua e lei alu iai lona mafaufau ona o loo mafatia pea i lea taimi i le valalau a le Atua ia Patu o lē sa la mafuta.

O le aso na sosoo ai na fesootai atu ai le Public Trust e oo atu e faatalanoa le uili a Patu. O le taimi lea na ia toe tomanatu ai i le faamatalaga a Katalaina lea sa fai atu ma ia lafoina ai loa le feau tusitusia i lea lava taimi ia Katalaina. O le feau tusitusia na ia talosaga ai ia Katalaina e aua le aveina le uili i le Public Trust ae sei o la talanoa muamua ma soalaupule.

E lei tali atu Katalaina ia te ia e tusa o le feau tusitusia, ae o le aso 17 na agai ai loa mo le faitauina o le mavaega tusitusia a Patu i le ofisa o le Public Trust. Sa ia ta’ua na tolaulau mai le uili o loo vaevae mai ia i latou ma Tuifuisa’a Maka Sapolu, Katalaina Sapolu, o le tina sa faia a la feau ia Usha Kumar, faapea ai le fanau muamua a Patu o loo aumau i Niu Sila.

O le tulaga na ia ta’ua na faateia tele ai ona o Maka le isi tagata autu o loo agai iai le tele o le mavaega (Major Beneficiary).

O le saini a Patu o le isi itu lea na ia ta’ua e le amiotonu ma fesiligia ai le uili lea ona o Patu o lana saini lava e faaaoga o le PFM, Sapolu, sa ia faailoa o le saini tuai sa faaaoga e lona toalua a o lei faasuafaina ia Patu i le 1999, o Falefatu Maka Sapolu, peitai na mae’a loa le saofai ma faaaoga ai loa lana saini lea PFM, Sapolu e le gata o lona tusifolau, o tusi i mataupu tau faamasinoga ma le malo, o siaki, o lana pepa saofa’i , o invoices ma faatauga online.

O le uili o loo faapea mai na saini e Patu i le aso 25 o Setema 2020, o le taimi lea o taofia ai le Afioga Patu i le falema’i a o sauni atu e malaga mo togafitiga i Niu Sila.

Na faailoa e Iliganoa sa tusi atu le Public Trust i lana loia o le uili o loo masalomia sa tuuina atu lea e Katalaina peitai e le o faailoaina ai i totonu le tagata na ia tusia ma saunia. Na ta’ua fo’i e le faletua o lona toalua e le masani ona faaaoga komepiuta ma typewriter, o lana auala lava e faatino ai ana galuega e pei o tusi ma soo se mea, o le tusia lea e faaaogaina ai le peni ma le pepa, ma ua ia fesiligia ai le moni o lenei mavaega o loo tuuina atu ua mae’a taina.

Na ia ta’ua e ofo ona o lea ua le saini lona toalua e faaaogaina ai lana saini ua masani ai, atoa ai ma le saunia o le mavaega e le o se loia na faia pe tuuina atu foi i se ofisa loia, ae le gata i lea, o le tuuina atu lea o le mavaega e faamauina ma taofia e se loia aemaise o le tuuina mai auala talafeagai e tusa ma le Tulafono.

Sa tuuina atu e le faletua i le faamasinoga e faapea e ui e le o maua tonu poo ai na saunia le mavaega ae iai lona lagona ma faamautu i mau, o Katalaina na ia faia ona o loo ia malamalama lelei i le talanoa atu ia te ia faatoa uma lava ona teu Patu, ma faailoa atu le mavaega, e le gata i lea o ia sa iai le mavaega tusitusia, ma o ia foi na tuuina atu i le Public Trust.

Na faailoa e Iliganoa nisi o fuaiupu i le mavaega o loo faate’ia ai o ia ona o loo faapea mai o lo la fale o le a faatumauina ona nofo ai pea pe a le toe faaipoipo atu, afai e maliu e le mafai ona tuuina atu i se tasi o le fanau ae o le a tuuina atu ia Maka Sapolu. O loo ia fesiligia le maua ai o le sea o Maka ae o ia lea sa ta’ua o le uso o Patu ae le o se atalii o Patu.

E le moni le faamatalaga e faapea na vaetama Patu ia Maka ae faatoa 4 ona tausaga. O le mau a Iliganoa, o mātua o Patu sa vaetamaina Maka, o le ala lea sa ta’ua ai o le uso laitiiti o Patu, e lei ta’ua lava mai le amataga o se atalii o Patu.

Ua mae’a foi ona ta’ua e Patu a o lei maliu o loo ua mautu atu le nofoaga o mātua o Patu i Motootua ia Maka ma o loo nofo ai o ia ma lana uo teine.

Sa ia ta’ua o lona toalua o se tagata polofesa i tulaga faapea, ae o tulaga o loo faia ai lenei mavaega e lei molimauina e se loia ae o lea ua molimau ai nisi o le aiga faapea le aufaigaluega e oo lava ia Alaifetu Enari o se tausoga o Maka o loo saini ai foi.

Sa valaau foi mau a nisi o le aufaigaluega e pei o le tamaitai teufale ia Sainimere na ia ta’ua o ia e sifi ao i le taimi na taofia ai Patu i le falemai lea e faapea o le aso foi lea na saini ai le mavaega, sa ia faailoa o Maka Sapolu o laua ma Alaifetu Enari poo Pepsi e sifi po.

O le taeao lea o le aso 25 o Setema sa usu atu ai poo le ta o le fitu i le taeao, o le taimi lea na alu ese mai ai Maka, na te lei vaai foi ia Pepsi. O le taeao foi lea e lei ala i luga Patu ae sa moe, poo le lata i le 9 i le taeao ae o atu loa Katalaina ma Maka. O Katalaina na faamalosi ia e saini ma tusi lona igoa.

Sa umi se taimi o tulituli lea molimau ona o le femoumoua’i o ana faamatalaga, aemaise ai o le faamatalaga lona lua lea na suia ai le faamatalaga muamua, lea na ia ta’ua ai sa faia le masini faamamatoto a Patu i le taeao lea e pei ona oo atu ai le tamaitai tausima’i, mulimuli ane ai toe faamatala mai i le faamatalaga lona lua e lei faia se faamama i le taeao lea a le Afioga Patu.

O le a faaauau le faamasinoga o lenei mataupu taeao, amata i le fesiligia e le itu a Maka Sapolu ma Katalaina Sapolu faapea le Public Trust le faletua ia Iliganoa e tusa ai o lana faamatalaga ua tuuina atu i le Faamasinoga.