E le’i milia faau’u upu a le Alii Minisita pe faaoleole foi i ni lole suamalie le Matagaluega o Leoleo i le taeao analeila ina ua maua le avanoa e tuuina mai ai lana saunoaga, ae o se matūpalapala o le Matagaluega, o lea ua amata le laupepa fou o galuega i lalo o le ta’ita’iga a le Alii Komesina le tofa Auapaau Logoitino Filipo mo le isi tolu tausaga. 

O le feiloa’iga na ta’ua e faapea o le faailoaina aloaia i le Matagaluega o le Alii Komesina Fou. 

O le autu o le saunoaga a Faualo, ‘O le avanoa ua tuuina mai ia faamautu ma lagolago ai le faatuatuaga ua aumai i le matagaluega.’ 

O mea ‘anoa na ta’ua i lana saunoaga e aofia ai le filifiliga o se Komesina fou, e ala i le numera o i latou na tusi talosaga, lea e aofia ai ni loia se to’atolu. O ni tamafanau e agavaa o le atunuu, o nisi e maualuga tulaga sa galulue ai i fafo, peitai i lana tilotilo na ia faatuatuaina ai se tagata mai totonu lava o le Matagaluega. 

“Ou te faatuatuaina ma ou talitonu ia outou.” 

Saunoa Faualo o le suiga mai o le Tulafono o le 1977 sa tofia ai Komesina ua tuanai na vaaia ai le tulaga lea e pei ua faapolokiki le faiga o le Komesina o Leoleo, ma ua fai lava i le tagata e mana’o iai le malo. 

“Ua mou le tulaga lea e fai i merits, a lelei le faatinoga o galuega, ma e pasi i le su’ega ua e Komesina.” 

Sa ia ta’ua foi o lea tofiga sa fai lava i le umi e faigaluega ai le tagata se’iloga e faamavae ma le matagaluega ona mae’a lea o le tofi Komesina. 

Na ia faailoatino foi nisi o tulaga o loo vaemanua ai le galuega a leoleo, e ala lea i le tele o mataupu e togi i fafo e le Faamasinoga ona o le lē lava o mau. “O i tonu o loo vaaia ai le tulaga o loo iai le faatinoga o galuega a leoleo.” 

E lē gata i lea o le tele o leoleo e aafia i soligatulafono e pei ona iai leoleo talu ai nei na aafia i aisa, ae sa faapitoa lana saunoaga i le tulaga o le mataupu o loo tālia ai nei se faai’uga a le Faamasinoga Maualalo, i le tagi a se tasi sa avea ma ta’ita’i leoleo, sa avea foi ma faipule o le Palemene… ina ua lalafo tala e se tasi alii sa avea foi ma leoleo e faapea, na taumafai e faamalosi se tamaitai leoleo. 

Na ta’ua e le Minisita, o popolega o loo faatulai mai o le faaaogā lea e leoleo sinia o tofiga e ole ai teine leoleo laiti (sexual harassment) o mea ia e faasā i le tulafono. 

“E lē gata i le faaaogā sese o le tofi, ae ua iai foi le isi tulaga a oo i se taimi ua faaletonu le auaunaga a le teine lea, ae ua e mana’o e tuli, ua e fefe e tuli, auā e te fai atu ae faapea mai le teine, e tuli loa a’u o’u ta’ua oe.” 

Faailoa e Faualo o le faanoanoaga…“Afai o lea e fai e leoleo tamaloa maualuga le tulaga lea, o ai se tamā o ai se tina e fia mana’o e alu atu sana tama teine e leoleo pe afai o le taunuuga lea e taunuu iai?” 

“Faato’ā lē malu lava Samoa pe a lē savali le alii ma le tamaitai leoleo i lona tiute faamaoni faaleoleo, lē savali i le Tulafono, lē amana’ia le tausiga o aiātatau a tagata ia o loo tatou puipuia.” 

Na ia ta’ua o le tulaga tonu lea e ala ai ona sulu atu le atunuu i leoleo. Sa ia toe faamamafa le tautoga, e tausi le Tulafono ma le Faavae o Samoa e aunoa ma le fefe pe faa’au’au foi. 

E ioeina e le alii minisita o le galuega e lē faigofie, ae ui i le faigata… o le tulafono lava e ta’ita’ia le galuega ma afai e savali ai e leai se mea e faaletonu ai le auaunaga.  

Na ta’ua e Faualo, a tofi le Komesina o se tagata na amata mai lalo, na te silafia lelei vaipanoa e oo i tofiga eseese i totonu o le matagaluega auā sa savali mai ai. 

Na mae’a le lauga a le Alii Minisita, ae tulai mai le tamaitai Komesina Lagolago ia Papalii Monalisa Keti faatulai ese le autusitala ma le aufaasalalau mai le maota o Tupulaga Talavou o le EFKS sa fai ai le feiloaiga a le Matagaluega ma le Minisita i le taeao analeila. 

O le saunoaga a le Tamaita’i Komesina Lagolago o le faatasiga lea, o le faatasiga faalotoifale lava o le matagaluega ma e lē faatagaina ai le aufaasalalau, peitai sa fesoota’i mai le Minisita i le taeao mo le aufaasalalau ina ia auai i le feiloaiga lenei e faailoa aloaia ai i le Matagaluega le Komesina fou.