O le tala faatatau autu fou o le tupe o loo soalaupule nei e le Palemene ua aiaia ai le isi 51 miliona tala mo le polokleti o le miliona mo itumalo e 51, ae o le tala autu o le tupe o loo faagasolo o loo iai le isi 51 miliona ua pasia mo lea lava atina’e ma o le miliona tala lona lua lea mo itumalo faapalota o le atunuu.
O le Aso Lulu o lenei vaiaso na faasaini ai maliega mo itumalo palota e lima mo vaegatupe muamua ta’i 160 afe o le miliona tala lona lua.
O itumalo palota ia e aofia ai Alataua i Sisifo ma Gagaemauga 3 i le motu o Savaii, ma itumalo palota e 3 i Upolu e aofia ai Falelatai ma Samatau, Sagaga 4 ma Aleipata Itupa i Lalo.
O le 16 pasene o le ta’i miliona tala a ia itumalo e lima ua faamatuu iai, o le a totogi ai le aufaigaluega ma alauni o sui o le komiti o Fono Faavae.
E faato’ā faamatuu le 420 afe muamua o le tupe e 840 afe o loo totoe mo ia itumalo faapalota pe a faamalieina faamatalaga uma o lipoti o le sueina o tusi i le faaaogāina o le 160 afe tala ua muamua faamatuu i faipule o ia itumalo o i latou o ta’ita’ifono o komiti o Fono Faavae.
I se tasi o mataupu e faasino lava i lea poloketi a le Malo, o le vaiaso nei i le fono a le Palemene na faailoa ai e le sui faipule o Faasaleleaga Numera 5 le afioga Peseta Vaifou Tevagaena, o ia ua faamuta lona tofi ta’ita’ifono o le komiti o le Fono Faavae a lona itumalo, ona o se faaiuga a le komiti ua faamaonia e le komiti faatonu o le poloketi.
Na faailoa e Peseta i le Palemene e tasi le tausaga ua faamalolo ai lona toe avea ma ta’ita’ifono.
