Ua faailoa e le tamaitai Palemia le Afioga Fiame Naomi Mataafa, le tapenaga o le polokalame o le malaga mai o le tamaitai Palemia o Niu Sila ia Jacinda Ardern ma lana aumalaga e faamanatu i Samoa le atoaga o le 60 tausaga o le Feagaiga Faauo poo le Treaty of Friendship i le va o atunuu e lua.
O le Aso Gafua aso muamua o Aokuso e taunuu ai le tamaitai Palemia ma sui o le Malo Niu Sila i se vaalele o le Malo, ona afifio lea i le Maota Mata’aga o le Tusitala lauiloa o Lopati Lui Sitivinisone i Vailima mo le ‘ava o le feiloa’iga ma sosoo ai ma se tali faaaloalo a le Malo o Samoa.
O le Aso Lua o le a feiloa’i ai le Palemia o Niu Sila ma le afioga i le Ao o le Malo ma a mae’a ona feiloa’i ai lea o tamaitai Palemia e to’alua ma le vasega o tusitala e faalauiloa ai nisi o mataupu aemaise lava poo le ā se oso o tapena mai e le Malo o Niu Sila e pine faamau ai le 60 tausaga o le Feagaiga Faaleuo na sainia ia Aokuso o le tausaga e 1962, i le tuana’i o le fitu masina talu ona tuto’atasi lo tatou atunuu mai pulega faakolone a Niu Sila.
O le afiafi o le Aso Lua lea o le tali faaaloalo a le Malo o Niu Sila, ma faapena ona toe taliu atu ai i Aotearoa le tamaitai Palemia ma lana aumalaga.
