O le maua o ponaivi o tagata sei tulou, i le nofoaga a le aoga a Epsom Girls Grammar i se taimi e lei mamao atu, o se mataupu ua eseese finagalo ua faaalia ai.
O le asō ua faailoa ai e le RNZ na solia e le aoga le tikanga poo tu ma aga faa-Maoli e faatatau i mea faapea ina ua o latou valaauina ni tamaiti aoga Maoli se toalua e faia le karakia poo se tatalo i ponaivi ia a o lei aveesea mai ma le aoga ona faapea a latou o ni vaega sa faaaoga i aoaoga i le tuanai. O se gaioiga ua popole ma lē fiafia ai aiga.
Fai mai le sui o le Ngati Whatua Orakei Trust Ngarimu Blair sa fesootai atu i le aoga ma o le a fono foi ma latou ina ia tuuina iai se fesoasoani ma le lagolago.
Fai mai Blair i tausaga ua tuanai sa iai lava tulaga faapea i aoga sa faaaoga mo aoaoga ma o se mataupu e ao foi ona silasila iai le matagaluega o aoga mo le foia o le toe tulai mai o lea tulaga.
O se finagalo o le minisita lagolago o Aoga, Kelvin Davis i le Newshub o loo ia taua ai e leai sona faafitauli i tulaga faapea i aoga pe afai e foai lava e aiga latou ma tagata ponaivi mo suesuega ma aoga, pau le tulaga sa tatau ona faia muamua le faamanuia talafeagai ona faaaoga ai lea.
O le taimi nei ua auina atu nei ponaivi i le Iunivesite o Aukilani.
