O le vaiaso nei ua atoa iai le 12 masina talu ona aumai le faai’uga a le faamasinoga o talosaga poo le faamasinoga apili na poloaina ai le faasee ese loa o le faigamalo tausi sa vaaia le Malo i le mae’a o le palota tele ia Aperila o le tausaga na te’a nei, ae see atu le vaega faaupufai o le Faatuatua i le Atua Samoa ua Tasi sa umia le 26 nofoa o le aofaiga e 51 o nofoa o le Palemene, e tauaveina le pulega malo ina ua aloaia faaletulafono e le faamasinoga o talosaga apili le faatautoga i le fale’ie i le aso 24 o Me o le tausaga ua mavae.
O lea faai’uga na faato’ā mafai ai foi ona nofoia e le tamaitai Palemia ma Minisita o lana Kapeneta na faalauiloa ma faatauto i le fale’ie i lumāmaota o le Palemene, ofisa o le Malo. O se tasi lea o tala faamauina i le talafaasolopito o paeaiga a le Palemene o le Malo Tuto’atasi o Samoa aemaise o faiga filifiliga a le atunuu e ala i le palotaina o sui usufono o le Fono Aoao Faitulafono.
O le Aso Faraile le aso 23 o Iulai o le tausaga 2021 na fofogaina ai le faai’uga a le faamasinoga o talosaga apili, ae o le aso 27 o Iulai o le tausaga lava ua mavae na ulufale ai le faigamalo fou e tauave le pulega o le Malo. O le mutaaga foi lea o le 22 tausaga o avea le sui faipule o le itumalo o Lepa susuga Tuilaepa L Sailele Malielegaoi ma Palemia ma le 40 tausaga o tauave e lana pati faaupufai le pulega o le Malo.
O le taimi muamua foi lea na avea ai se uluai tamaitai ma Palemia le sui faipule o le itumalo o Lotofaga le afioga i le Sa’o Faapito, Fiame Naomi Mataafa.
