O Constable Sophie Allison ma le leoleo suesue, detective constable Jeremy Toschi, o malu o le malo na tauaao iai e le tamaitai Palemia Jacinda Ardern faailoga o le lototoa, mai le asosi o leoleo a o usuia ai lana fonotaga faaletausaga masani i Ueligitone i le vaiaso nei. 

O malu ia o le malo sa o la faafetauia le tagata na agai atu ma le naifi tulou i le supamaketi a le Countdown i Dunedin i le masina o Me o le tausaga na tea nei.

O i laua uma ia e toalua sa iai i le nofoaga lea i le taimi na tupu ai le faalavelave ae sa ofu savili le isi a o faia lana malologa a o le isi o lona aso malolo lea mai galuega.

O le faalavelave lea na faamanualia ai nisi o le aufaigaluega a le supamaketi ma nisi o le atunuu lautele.

Saunoa le Palemia e faafetaia le lototele o i laua ia ma le la galuega na faia na taofia ai le ono faamanualia o nisi mau tagata pe ma’umau foi ni soifua.