O le aso 26 o Iulai le Aso Lua asau o le a faamuta ai le iai o Samoa i taimi o faalavelave faafuasei le State of Emergency e pei ona sa amata faaamamalu ai i le tausaga e 2020 vavao ona o puipuiga o le atunuu atoa mai le faama’i Koviti-19.
Ua faailoa lea fuafuaga e le ta’ita’ifono o le Komiti o Faalavelave faafuasei le tofa Agafili Tomaimano Shem Leo, i se feiloa’iga i le Aso Lulu ma tusitala a o tulimata’i ai le amataga o le masina fou o Aokuso o le a toe tatala ai tuaoi faavaomalo o Samoa mo malaga masani.
O le feiloaiga lea na faailoa ai foi e le sui faatonu sili o le soifua mālōlōina e lē o toe faia ni su’ega poo test mo pasese o loo malaga mai ae ua tuu iai le aiaiga e tatau ona agai i se falema’i e faia ai ni sailiiliga faafoma’i i auga o le korona vairusi pe a mae’a aso e lima talu ona taunuu i Samoa.
Ua faailoa e le sui faatonu sili le afioga Tagaloa Dr Robert Thompsen ia suiga o le tautua faasoifua mālōlōina mo tagata malaga mai fafo, ae a oo ina toe tatala malaga masani i le masina fou, o le a faatumau pea isi aiaiga o puipuiga o le faama’i mo tagata malaga uma a o le’i taunuu mai.
Le sui faatonu sili o le soifua mālōlōina le susuga i le alii foma’i afioga Tagaloa Dr Robert Thompsen.
