E 12 masina o le a tapena ai le fausia o se nofoaga fou e gaosia ai le pia o le Vailima i totonu lava o Samoa, ona faato’ā faatino lea o fuafuaga ua taoto iai le aiaiga ua faamatuu atu ai e le pulega o le Samoa Breweries Limited le laisene e faaauau ai pea ona gaosia lea oloa tau ‘ava malosi i le atunuu.
Ua faaalia e le alii loia o le pulega fou o le gaosiga o le Vailima le susuga Charlie Vaai, o lea tapenaga o le a faasee ai le gaosiga o le beer i fafo o Samoa ae se’i faagasolo fuafuaga ona faato’ā faatino ai lea o le faamoemoe pe a mae’a ona fausia le nofoaga fou o le a iai ma masini fou mo le gaosiga o le pia o le Vailima.
Faaalia e le alii loia i se talanoaga ua faailoa atu le agaga fiafia o le tamaitai Palemia, i le nofo pea o galuega o le gaosiga o lea oloa i Samoa, ina ia maua ai pea avanoa faigaluega mo o tatou tagata. Faaalia foi e Charlie Vaai ua faaoo atu foi le faafetai a nisi o le aufaigaluega o le kamupani gaosi ‘ava malosi i Vaitele.
Ua 43 tausaga o le kamupani ‘ava malosi o le Vailima i Vaitele ma o le uluai falegaosi ‘ava malosi foi lea na faatūina i le atunuu.
