Ua faafetaia e pisinisi e fesootai ma femalagaa’iga faavaomalo le vave tatala o tuaoi o Niu Sila, peitai o loo faatalosagaina le vave faamuta loa o siaki o loo faia ae e le’i faimalaga.
O le aso 31 o Iulai lea ua tuu mai ai i luma le aso e faataga ai loa soo se pasese e ulufale mai i Niu Sila aofia ai ma meli tetele faapea fanau aoga mai fafo.
O Oketopa lea na tuu faato’ā tupu ai, peitai o le sau o le faasilasilaga mai le Palemia Jacinda Ardern ananafi o se tala fiafia lea e le gata o uo ma aiga o loo i atunuu i fafo e le o agavaa i le taimi lenei, ae faapea foi aiga iinei ua silia ma le lua tausaga o valavala.
Pau le suiga e le o mafai ona vave maua se tali, o le talosaga na folasia e faamuta loa pre-departure tests lea e tatau ona faia a’o e le’i oso i le vaalele, ma o le faaiuga o Iulai lea foi ua faailoa mai e faato’ā aveese ai.
Ae mai le Palemia ananafi, e tāua lava le faaauau o le mata’itu o tuaoi ma o loo faatumauina pea pre-departure tests i le taimi nei.
