O le feiloa’iga muamua a le Komesina fou o le Matagaluega o Leoleo, Falepuipui ma le Ola Toe Fuata’ina ma Malu o le Malo talu ona filifilia le tofa Auapa’au Logoitino Filipo e avea ma faauluuluga o le matagaluega, na tomua i le saunoaga a le Minisita le afioga Faualo Lefau Harry Jeffrey Schuster, sa ia tima’i ma faufautua ai i alii ma tamaitai leoleo faapea leoleo o le falepuipui ma ave foi iai lu’itau o loo feagai ma latou ina ia silasila iai ma faatino ni auala e fofō ai.
Na amata le saunoaga a le Minisita i lona faailoa o le filifiliga o se komesina na talosaga ai tagata e to’afitu lea e to’alima mai le matagaluega ma le to’alua i fafo mai o le auaunaga faaleoleo. O le filifiliga o se faauluuluga na faaalia e le afioga Faualo sa finagalo ai e tatau lava ona saili mai i totonu o le matagaluega lea na tofia ai Auapa’au Logoitino Filipo, i le lata ai ina atoa le tausaga i le masina fou o Aokuso talu ona faamavae lē sa avea ma Komesina.
O le faamaoni ma savali i le tulafono aemaise ia tuto’atasi le galuega e aunoa ma le faaitu’au na saunoa le Minisita a atoa uma ia tulaga e lē fesiligia ai e le atunuu le faatinoga o le tautua a Malu o le Malo. Peitai sa ia manatu e fola pea nisi o lu’itau ma faafitauli mo le silafia e le matagaluega, a o faafofoga ma le toto’a le Komesina ma le Pulega aemaise o le lautele o alii ma tamaitai leoleo ma le vasega o leoleo o le falepuipui i Tanumalala.
Se vaega o le saunoaga a le Minisita o le Matagaluega o Leoleo, Falepuipui ma le Ola Toe Fuata’ina afioga Faualo H Jeffrey Schuster. Sa lē talia ona auai le aufaasalalau ma tusitala i le taimi na saunoa ai le Komesina fou filifilia o le matagaluega i se finagalo na faailoa e se tasi o sui komesina le susuga Papalii Monalisa Tia’i Keti, o se feiloa’iga faalotoifale ua na o le komesina ma le pulega faapea le vasega o Malu o le Malo.
O le maota o Tupulaga a le Ekalesia Faapotopotoga Kerisiano Samoa i Mulinuu na faia ai lea faatasiga muamua a le Minisita, o le komesina filifilia fou ma le matagaluega o leoleo, falepuipui ma le ola toe fuata’ina.
