Ua tapena ese ma le nofoaga o le malaevaalele i Fagalii le auaunaga a le vaega o taavale afi a le Matagaluega o Leoleo, Falepuipui ma le Ola Toe Fuata’ina ma ua toe agai i le nofoaga autu o lea vaega o le matagaluega i le ofisa tutotonu i Apia, e faapena foi i le ofisa o su’esu’ega faalotoifale i mataupu e aafia ai amio a alii ma tamaitai o Malu o le Malo le Police Professional Standards Unit poo le P.S.U., sa faamautu foi i Fagalii.
Ua faailoa e se molimau faatuatuaina ua tolu nei aso talu ona see atu le vaega o su’esu’ega faalotoifale a le matagaluega, i se potu o le maota o le Malo i le eleele fou i le fogafale i lalo i le nofoaga sa iai muamua le ofisa o mataupu tau femalagaa’iga a le Matagaluega a le Palemia ma le Kapeneta i tausaga ua tuana’i.
E le’i maua se fesoota’iga i le Komesina o Leoleo mo se faamaninoga o lea tulaga ae ua iai le talitonuga, o le amataga lea o tapenaga i le fuafuaga a le Minisita ma le Matagaluega o Galuega Tetele a le Malo, e toe tatala le malaevaalele i Fagalii mo faiga malaga masani i le va o Upolu ma Savaii faapea malaga a vaalele i le va o Samoa ma Amerika Samoa.
O le lua tausaga ua mavae mai le aso 31 o Tesema o le tausaga e 2019 na tapunia ai le malaevaalele i Fagalii ma faaaogā ai le malaevaalele faavaomalo i Faleolo mo faiga malaga i le va o Samoa e lua faapea malaga i Savaii. Na iai foi le taimi i totonu o ia tausaga e lua na lē toe faia ai ni malaga a vaalele laiti o le Samoa Airways i le va o Upolu ma Savaii ona o tulaga faaletonu i tupe maua mai lea alavaa.
