O le lipoti o le fitu aso talu ai mai le aso 10 i le aso 17 o le masina nei o Iulai ua faailoa i faamaumauga a le matagaluega o le soifua mālōlōina le maualuga o pasene o le faitau aofa’i o tagata i lo tatou atunuu, mai le 18 tausaga agai i luga, 12 i le 17 tausaga le matutua ma le fanau i le 5 i le 11 tausaga ua mae’a faia tuipuipui o le faama’i korona vairusi poo le Koviti-19.

Ua 93 tesimale 6 pasene poo le aofa’iga e 114,113 tagata ua mae’a tui e lua i le matutua o le 18 tausaga ma luga atu, 92 tesimale 4 pasene poo le aofa’iga o tagata e 25, 791 mai le matutua o le 12 i le 17 tausaga ua mae’a tui e lua, ma le 5 i le 11 tausaga ua 91 tesimale 4 pasene poo le aofa’iga e 37,124 ua mae’a foi tui e lua.

Ua 77,329 tagata ua mae’a tui faaopoopo poo le booster, ma o le aofa’iga tuufaatasi lea o tagata ua mae’a tui faaopoopo i le taamilosaga muamua le first round e 77,140 ma le 189 o tagata na faia le tui faaopoopo i le taamilosaga lona lua. O le fitu aso ua tuanai sa faamauina ai le 62 o gasegase fou o le Koviti-19 ma ua oo atu ai le aofa’iga atoa o tagata i le lautele o le atunuu ma pasese na malaga mai fafo ua maua i le faama’i i le 15,183.

E to’alua gasegase o loo taofia i nofoaga faapitoa i le maota gasegase i Motootua ae leai ni gasegase i potu tigaina.