O Faleata 2 se tasi o itumalo faapalota e silia i le 10 afe lona faitauaofa’i poo le numela o tagata o loo alala ma faamautū ai.
O le fesoasoani a le malo o le toe foi i le a’oga lea e maua ai e le tagata e to’atasi mai le pepe faato’ā fanau se’ia oo i se tagata aupito matua tausaga o le soifua le 150 tālā ua valo’ia le faaalu uma ai o le tasi le miliona ma le valu selau afe tālā o tupe o le poloketi a le Fono Faavae a lea itumalo.
Ua faailoa e le Faipule ma le tasi o ta’ita’ifono soofaatasi o le Fono Faavae a Faleata 2 le tofa Leatinuu Wayne So’oialo i le upega tafa’ilagi le api o foliga, o le faitau aofa’i o tagata e tusa ma le 12 afe i lona itumalo o le a aofia ai ma fanau o loo tausia i le nofoaga o le Toomaga mo ē Puapuagatia i Tuanaimato o se vaega o loo lavea i le faafanua o le itumalo palota o Faleata 2.
Ua faailoa ai e le sui faipule i tagata uma o le itumalo i lea auala o fesoota’iga faaonaponei, o le tufaina o le fesoasoani e 150 tālā o le a lē faia ai ni poloketi ae o le a faato’ā faatino pe a oo atu i le tufatufaga o le 2 miliona tālā i le tausaga faaletupe fou lea e amata ia Iulai o le tausaga nei.
O le Aso Toonai 28 o Fepuari e faato’ā amata faasoa ai le fesoasoani tupe o le toe foi i le a’oga a lea itumalo pe a mae’a le palota laiti o loo loma nei i le vaiaso fou.
