E le’i manuia le talosaga a le ulugalii mai Aukilani, e taofia le faailoaina faalaua’itele o o la suafa, ma ua faailoa ai nei, o Alexander Sa’umani Afaese Filipo, e 37 tausaga o le soifua, ma lona to’alua le fafine o Senia Filipo, e 39 tausaga o le soifua, ua faasala nei e le Faamasinoga Faaitumalo a Aukilani, i le community detention mo le ono masina, ina ua faamaonia lo la faaaogā faasolitulafono o se tupe tele na teu sesē atu i le la tusitupe.
E $158 afe tālā le seleni lea na aafia ai lenei ulugalii, ma e tusa o le lipoti a le New Zealand Herald, o se tamā mai Mt Roskill ua penisione e 78 tausaga le soifua, o Andrew Che Sit Bong, sa taumafai e aveese mai lana seleni ua leva ona sefe i sana teugatupe sa fai i se faletupe i Peretania, ae teu mai i lana teugatupe i le faletupe a le Westpac i Aukilani.
Peita’i, e tasi le fuainumera na misi ona type i totonu e le toeaina mo lana teugatupe, ae sesē ai loa le numera na ia type i totonu ma alu ai loa lenei seleni telē i le numera o le teugatupe a le fafine o Senia.
Na ta’ua ai e le ulugalii ina ua tutula’i i le faamasinoga, o la’ua na faate’ia ina ua tatala atu le teugatupe a Senia ua iai lenei aofa’iga tele, ma na la ta’ua i leoleo, sa la manatu ai o ni tupe na manumālō ai mai taaloga faitupe, online casino e masani ona taalo ai le tamaloa o Alexander.
Peita’i na ta’ua e le faamasino, e lē lava le moni o lena faamatalaga, ona e maitauina na vave ona gaioi lenei ulugalii e tala ese lenei tupe mai le la teugatupe, ma faaaogā loa e totogi ai la pili, ma lafo le $20,000 i aiga i Samoa, ma faatau ai foi se van fou o le ituaiga o le Hilux.
O Senia e to’alima lana fanau, ma sa ia ioeina lona moliaga o le gaoi, ae ioeina e lona to’alua le moliaga o lona mauaina o le $64,000 mai lea tupe.
Na ioeina e lea ulugalii sa tatau ona fai atili ni la sa’ili’iliga poo fea tonu na sau ai lena seleni telē a o le’i talaina i tua le tupe.
Na ta’ua foi i totonu o le faamasinoga, o la sa faamauina lava i le bank statement a Senia, le mea na sau ai le tupe, o le Barclays Bank, e lē o se vaega o taaloga faitupe i luga o le initaneti.
Na saunoa Judge Lance, e leai se faamaoniga o le moni o la faamatalaga i lo la manatu atonu o so la manumālō mai se taaloga faitupe, ma na teena ai e le faamasino le talosaga a le ulugalii ina ia faapafala le la mataupu e aunoa ma le faamauina ua solitulafono, ma teena ai foi le faaauau pea ona taofia le faailoa faalaua’itele o o la suafa.
Na finau le loia sa tula’i mo le ulugalii, o Zaina Nisha, ua lagona e le ulugalii le salamō i la gaioiga na fai ma ioe, sa tatau ona fai atili ni la sa’ili’iliga ina ua maua atu le tupe.
Na finau foi Zaina, e lē tatau ona lafo uma le tuua’iga i le ulugalii, auā na māfua foi ona alu sesē le tupe i le la taugatupe, ona o le sasi o le gaioiga a le toeaina o Che.
O le isi māfua’aga sa ta’ua e le loia na finauina ai le taofia o suafa, ina ia puipuia ai Alexander i le ono aafia mai lana galuega, ona e na o ia le tagata faigaluega e tausia lona to’alua ma le la fanau.
Peitai na teena e le faamasinoa le talosaga i le faapea mai, e lē matuā ogaoga tele le soligatulafono na faatino, ma o i’uga o le faamaonia o le la soligatulafono e le’i matuā mamafa na’uā pe a fua i le mamafa o soligatulafono na faatino.
