O le treaty poo le maliega mulimuli i le va o Amerika ma Lusia e faatatau i ‘au’upega niukilia, ua lata nei ina mae’a lona taimi sa faatulagaina ai ma ua afua ai ma nisi popolega e i’u ina toe vaaia foi le toe faamalosia o le gaosia o nisi ‘au’upega fou.
Fai mai le BBC o le Strategic Arms Reduction Treaty e faaigoa foi o le New Start na sainia i le 2010 i le va o atunuu e lua ma sa faia ina ia fesoasoani i le taofiofia o se taua faaniukilia.
Sa faatapulaa ai le aofa’i o ‘au’upega niukilia e gaosia e itu uma e lua i le 1550.
Afai la ae mae’a le maliega lea ua ta’ua e mae’a i le vaiaso nei o lona uiga o le i’uga foi lea o le galulue faatasi o ia atunuu i le taofiofia o taua e tula’i mai.
O le vaiaso nei ua una’ia ai e Pope Leo, Amerika ma Lusia ina ia toe faafou lea maliega ae ua ta’ua foi i le lipoti se faamatalaga a Trump i le matāupu lea i le masina na te’a nei na ia faailoa ai i le New York Times, afai lava e uma le aogā o le maliega, o lona uiga ua uma ae toe fai foi se isi maliega e sili atu.
Fai mai Lusia o se isi maliega faapea e toe faia i le lumana’i e ao lava ona aofia ai ma isi atunuu Europa e pei o Farani ma le United Kingdom.
Puna o Faamatalaga: https://www.bbc.com/news/articles/c4g31n4ey9go
