Ua iai nei se faai’uga a le Kapeneta ua toe faamautū ai le faatūina o le komiti e faatonutonuina le tau o oloa i le atunuu, o se faiga sa faatino i ni tausaga ua mavae ae na faamuta ina ua suia faiga faavae a le malo.
O le faatonutonuina o le tau o oloa o le a faasinoala ai le komiti o le tau o oloa i le fuafuaina o le tau a le faioloa e faatau atu ai se oloa e pei o taumafa tuu’aisa mai fafo, ma o lea tau ua aofia ai ma le tupe mamā poo le polofiti a le faioloa.
O le a lē toe soona siita’i le tau o oloa mana’omia i le faiga o le a toe foi iai pe a oo ina faaitiitia le tulaga maua o se oloa, aemaise pe a faaitiitia oloa tau taumafa e pei o le araisa ma le suka ma isi oloa tau taumafa e manaomia tele i aso uma.
O le toe faatūina o le komiti e pulea le tau o oloa na faailoa e le afioga i le Palemia i le feiloa’iga masani ma le vasega o tusitala i le Aso Tofi ua mavae.
