Ua faailoa ai nei e le pulega o le faletupe o atina’e le Samoa Development Bank avanoa taua mo faifaato’aga e faagaioia faapisinisi a latou taumafaiga poo commercial farmers, faapea pisinisi laiti ma feololo o loo gaosia oloa ma faatau i fafo, aemaise o atina’e tau tagata tafafao e faia ai ni a latou aitalafu poo nonōgatupe mai le 13 miliona tālā o tupe ua pasia e le malo.
I le faailoa lautele ai e le faletupe o le atina’e a le malo o lea fuafuaga o le Aso Tofi o le vaiaso fou le aso 12 o Fepuari e amata tatala ai le faitoto’a o le faletupe mo talosaga.
I lea aofa’iga o tupe o le 3 miliona o le a avanoa ai pisinisi laiti ma feololo o loo auina i fafo oloa e faatau ai, e talosaga i ni aitalafu i le va o le 20 afe ma le 100 afe tālā.
O le 10 miliona ua fuafua e nonō atu i pisinisi tau tagata tafafao mai fafo, o faato’aga o loo faagaioia faapisinisi, ma e avanoa ai foi pisinisi laiti ma feololo o loo faatinoina le gaosia o oloa i totonu o Samoa.
E mafai ona manuia se talosaga i le 10 miliona i se nonōgatupe e i le va o le 100 afe ma le 200 afe tālā.
Ua faailoa e le faletupe o atina’e o le a fua le talia o se talosaga i le faamalieina uma o aiaiga aemaise o le tulaga i faamaumauga e faamautinoa ai le lelei o le toe faaolaina atu o tupe o le a nonō mai ai i lea polokalame fesoasoani a le malo.
Ua na o pisinisi o loo lesitala i le Matāgaluega o Lafoga ma Tupe Maua ma o loo umia e tagatānuu o Samoa e agavaa ona talosaga i ni nonōgatupe.
