Ua faailoa e le Matāgaluega o Leoleo, Falepuipui ma le Toe Fuata’ina i lana upega tafa’ilagi le maliu o se malu o le malo a o faatino ona tiute faaleoleo.
O lea leoleo sa umia le tulaga faaleoleo o le satini ma na pa’ū ese ma se vaaafi o leoleo sa faia ai se latou galuega o le siakiina o le gataifale.
Ua faailoa e le matāgaluega lona suafa o Evile Paulo Ekueni ma o le Aso Lua na faatino ai le galuega ma pa’ū ai i le sami le maliu ae o le Aso Lulu na maua ai lona tino i sa’iliga sa faia e leoleo.
E lē o iai nisi faamatalaga ua tuuina mai i le māfua’aga o le mea na tupu ae ua momoli faamaisega ma faamafanafanaga a le matāgaluega i mātua ma aiga uma o le leoleo satini ua maliu.
I se isi o faalavelave ua lipotia le maliu o se taule’ale’a talavou o le afio’aga o Laulii ma o loo faia su’esu’ega a leoleo e iloa tonu ai le māfua’aga.
Ta’ua i se tasi o lipoti o tafega o le vaitafe i lea afio’aga le māfua’aga peita’i ua faailoa e se molimau, o se matai e lalata ona sootaga i le aiga o lē ua fano le soifua, o se ta’elega i le vaitafe na maliu ai le taule’ale’a ae lē o ni tāfega o le vaitafe na māfua ai.
O le fono a tusitala ma sui o le komiti o faalavelave faafuase’i i lenei vaiaso na aumai ai fautuaga mai le matāgaluega o leoleo ma le vaega o le fuimū ma galuega lavea’i i taimi o faalavelave i le tāua o le puipuiga o le saogalemu o le ola ma le soifua, e ala i le taumamao ese mai vaitafe i lenei taimi o le tausaga tau amata o loo fai ma palasi timuga e māfua ai tafega ma lōlōga.
