O loo fautuaina pea lo tatou atunuu e le soifua mālōlōina e tausisia puipuiga o le faama’i o le fiva o ponaivi poo le dengue fever, ona o loo iai pea tagata ua faamaonia o loo maua ai.
Ua faailoa e le Sui Faatonu Sili o le matāgaluega o le soifua mālōlōina le alii fomai o Tagaloa Dr Robert Thompsen le auina atu i Ausetalia o ni toto na tui mai nisi ua masalomia e su’esu’e atili ai pe faamaonia o āuga o lea faama’i ua maua ai.
I le fono a sui o le komiti o galuega fesoasoani i taimi o faalavelave faalenatura ma tusitala na faailoa ai e le sui faatonu sili o le soifua mālōlōina o faamaumauga a le matāgaluega i le fā vaiaso ua mavae o loo faamauina ai tagata na aafia i le fiva o ponaivi i falema’i faaitumalo i le atunuu.
E 54 sa faamauina le aafia i āuga ae 30 ma ona tupu na faamaonia ua maua i le fiva o ponaivi.
Ua faailoa foi e le Sui Faatonu Sili le oo atu o le logo a le faalapotopotoga o le soifua mālōlōina o le lalolagi e faatatau i le faama’i o le Nipah virus ua lipotia mai se vaega o le atunuu o Initia lea e na o le to’alua ni tagata ua aafia ai o ni tausi soifua.
O se faama’i sa maua foi i lea atunuu i le tausaga e 1998 e pei ona faailoa e Tagaloa Dr Robert Thompsen i lea feiloa’iga i le Aso Lua o lenei vaiaso.
