I le faamanatuina ai o le Aso faapitoa mo atunuu o le Taupulega (Commonwealth Day Service) na mafai ona auai ma pepese ai ni alo o Samoa, le tamaitai ia Isabella Moore ma le alii ia Benson Wilson.
I se faatalatalanoaga na tuufaatasia e le Coconut TV ma ia alo o Samoa na faaalia ai e le tamaitai ia Isabella, o le mitamitaga mo ia o lona mafai ona auai i lenei sauniga tāua, ua avea ai o ia ma avefu’a a Samoa i le faamanatuina o lea aso mo atunuu o le Taupulega.
Ta’ua e le alii o Benson o se avanoa matagofie lea ua maua e faalauiloa ai le atunuu, aemaise o lea ua faalauiloa e tauala mai le alaata o le BBC i le lalolagi atoa.
Na usuina e nei alo o Samoa le pese, “Tofa my Feleni”, ma na molimauina le matagofie o taumafaiga a ia alo o le atunuu a o faalologo ma le maofa le toatele o tagata taualoa na auai.
Sa faatautaia lea sauniga tele i le Westminster Abbey i Peretania, ma na auai atu iai le aigatupu ma le tele o sui taualoa o le atunuu mo le faamanatuina o lea aso tāua.
