O faiva e tapua’ia, o faiva na e manuia.
O le sini lea o tapenaga a le Tausala o Samoa le afioga Iliganoa Feagaimalii Soti Mapu, a o ia le’i tuua Samoa mo Fiti i le vaveao o le Aso Faraile o lenei vaiaso, auā lona faamoemoe e tausinio i le tauvaga e sa’ili ai se Tausala o le Pasefika e pei ona sa manumālō ai le tausala o le atunuu talu ai nei le tama’ita’i o Litara Ieremia Allan.
O le Aso Tofi na feiloa’i ai tusitala ma le Tausala o Samoa e faailoa ai sona finagalo i ana tapenaga ua sauni iai mo lea tauvaga tele a le Pasefika.
Le Tausala o Samoa le afioga Iliganoa Feagaimaalii Soti Mapu i le feiloa’iga ma le autusitala, a o le’i tuua le atunuu mo le tauvaga e sa’ili ai se Tausala o le Pasefika e amata faagasolo ona polokalame i le Aso Sa o lumana’i nei lea o loo talimalo ai le atunuu o Fiti.
